Annleis liv i Atriumhagen

Kari Moa og Bjarte Risnes bestemte seg ikkje over natta for å selje einebustaden, men når dei først gjorde det, var dei ikkje i tvil om kvar dei ville bu.

– Eg har hatt lyst til å kjøpe leilegheit lenge. Eg er klar for å leve litt annleis, seier Kari.

Ho har tatt ei pause frå den hektiske jobben som frisør i eigen salong, Salong Karisma, som ligg midt i Førde sentrum. Ho har tid til ein rask kopp kaffi saman med sambuaren Bjarte.

– Han har ikkje vore like klar som meg, seier Kari lurt og ser bort på han.

– Nei, ideen måtte modne litt, men no kjennest det rett, smiler Bjarte, som alltid har vore glad i å ha stor hage og utsikt.

– Difor sit det ekstra langt inne å kvitte seg med einebustaden vår i Slåttebakkane, forklarar han.

Først i Atriumhagen
Dei to var blant dei første til å kjøpe leilegheit i Atriumhagen i Førde – eit konsept som ein ikkje har sett så mange av i Sogn og Fjordane. Det unike med dei tolv husværa er det opne partiet i midten av leilegheitene, eit såkalla atrium der ein får privatliv og ro frå bybildet, samtidig som du kan nyte godt av lys, sol og frisk luft.

– Vi har atrium på hytta vår i Stavang og likar det veldig godt. Då Atriumhagen kom for sal hadde eg hatt auga opne lenge, og tenkte: Endeleg! Dette er det rette for oss. Vi er glade i den minimalistiske, moderne stilen, og likte planløysinga og at leilegheitene har både atrium og stor takterrasse, seier Kari.

Ryddeprosess
Kari og Bjarte har tre barn til saman. To av dei har flytta ut frå den 360 kvadratmeter store einebustaden i Slåttebakkane, medan yngste sonen på 17 bur heime.

– Sjølv om vi er svært glade i huset vårt, har vi innsett at vi ikkje treng all plassen lenger. Vi har til dømes fire bad, kva skal vi med det, ler Kari.

– Det er mykje å vaske og halde i orden, og no ønsker vi å bruke fritida vår på andre ting, som å reise oftare på hytta og å gå turar. Vi er friske og har mykje energi, og flytteprosessen ser vi på som ein sjanse til å rydde litt i livet.

Bjarte er tømrar av yrke og har bygd hytta deira, samt to andre hytter med atriumløysing. Han kjenner difor konseptet betre enn dei fleste.

– Eg har sansen for både stilen og konseptet. Å kunne sitte ute under open himmel i frisk luft, samtidig som ein er skjerma for vind og innsyn, er ei god løysing. I Atriumhagen får vi 30 kvadratmeter uteområde som vi kan opne opp mot frå stove og kjøkken og spasere rett ut til. Når vi skal bu i sentrum, er dette ei meir attraktiv løysing enn å sitte på utstilling på ein liten balkong, meiner han.

Kvalitet
Bjarte skryt samtidig av kvaliteten i bygget.

– Arkitekten (Christina Kvamme, red. merk.) sa sjølv at dette var eit av prosjekta ho hadde jobba med som hadde høgst standard. I Atriumhagen er det god kvalitet på alt av materiale, og vi slepp å oppgradere noko. Det betyr at alle kostnader ligg inne frå før. Det er godt å vite når du kjøper ei såpass dyr leilegheit, seier Bjarte.

– Vi har sett på mange leilegheiter, men dette er ein soleklar favoritt. At det er nytt betyr at vi får det akkurat som vi vil, seier Kari, og legg til:

– Vi har to hundar, og då er ein lukka uteplass, som dei kan gå inn og ut av, heilt genialt.

Vemodig farvel
Men vil dei ikkje sakne hage, utsikt og å ha sol heile året når dei går frå frittliggande, stor einebustad i høgda, til leilegheit i sentrum?

– Jo, det er sjølvsagt mykje vi vil sakne. Det blir eit vemodig farvel. Huset har mange minne, og her ein dag eg var i hagen, tenkte eg: Nei, kva er det vi gjer. Selje denne fine plassen?, svarar Kari.

– I tillegg er det eit fint nabolag med mange kjekke folk vi forlèt, legg Bjarte til.

– Men no som vi har bestemt oss, så kjennes det rett. Vi brukar all vår fritid på hytta, og då er det heilt greitt å bu i sentrum. Der kan vi spasere til både jobb, kafé, Hafstadparken og andre servicetilbod.

Men før det gode liv i sentrum kan starte, må dei selje einebustaden.

– Eigedomsmekling Sogn og Fjordane har vore ein god rådgjevar for oss og fortalt oss kva vi bør ordne før salet. Vi skal selje eit stort, dyrt hus til våren, og då bør prosessen vere omstendig og godt planlagt. Vi kjenner oss i trygge hender og gler oss til å flytte i Atriumhagen. Vi må berre rydde litt først og kvitte oss med ein del ting, ler paret.