Eigedomsmekling i ny drakt

I februar kjem vi i ny, burgunder drakt. Litt stiligare, men den same på innsida: Eit trygt og sikkert val når du skal selje bustad.

– Vi jobbar heile tida med å utvikle oss for å gje kundane det beste produktet. Dei siste åra har vi lagt ned mykje ressursar i salstrening, ny teknologi for målretta marknadsføring, profesjonelle fotografar og dronefoto. Når vi no vidareutviklar profilen, er det for å markere oss sterkare. Den skal bidra positivt i bustadsal og ikkje minst appellere og vere tydeleg, forklarar Kjartan Aarnes, konstituert dagleg leiar i Eigedomsmekling Sogn og Fjordane.

Med seg har han Mette Grytten, grafisk designar i Sparebanken Sogn og Fjordane si marknadsavdeling. Ho har fått jobben med å vidareutvikle profilen, og endringane medfører blant anna at eigedomsmekling får ein ny versjon av logoen og ny hovudfarge.

– Det har lenge vore behov for å skilje profilen til banken og eigedomsmekling. Vi skal fortsette å marknadsføre oss i lag, men med to logoar er det lettare å vise kven avsendaren er. Finanshuset Sparebanken Sogn og Fjordane tilbyr stor breidde i tenester, og no står merkevara til eigedomsmekling tydelegare.

Menneskeleg, nær og autentisk

Grytten seier at det kjennest veldig rett når dei no lanserer logoen i ny, burgunder drakt.

– Det er ein profil du får energi av! Vi har gått mange rundar for å finne rette fargen, men no som vi har bestemt oss, er eg sikker på at den står for det vi ønsker å formidle: det menneskelege, nære og autentiske.

Ho får støtte av Aarnes:

– Rådgjevarrolla kjem betre fram i den nye fargen. Vi er meir enn tal og omsetting av bustader. Det synest eg Mette har fått fram på ein fin måte, og eg håpar kundane opplever profilfornyinga som eit positivt løft. For oss er det viktig å alltid tilby det beste til kundane, og eit mål å vere den mest synlege og tydelege meklaren i området, avsluttar han.