Nytt bustadprosjekt på Søreide
Det nærmar seg salsstart av det nye bustadprosjektet på Søreide. Men før dei fem første leilegheitene kjem på marknaden, skal det stylast og fotograferast.
Sola har så vidt begynt å varme på Sandane denne marsdagen. Terrassane til det nye bustadprosjektet på Søreide badar i sol, og inn og ut av leilegheitene spring snekkarar, meklarar, ein fotograf og ein bustadstylist. Siste finishen på verket skal leggast, for endeleg skal leilegheitene ut for sal.
– Utbyggar har store planar for gamle Søreide skule, kan eigedomsmeklar Kamilla Nedre-Flo fortelje.
Saman med eigedomsmeklar Norunn Elise Aarnes har dei fått ansvaret for å marknadsføre og selje prosjektet, og i dag har dei bestilt stylist og fotograf til Søreide.
På sikt skal heile den gamle skuleplassen utviklast til eit triveleg buområde, med til saman 60 bueiningar i form av rekkehus og leilegheiter. Utbygginga skjer i fleire byggesteg, og først ut er fem moderne leilegheiter i ulike størrelsar.
Siste klargjering før sal
Marthe Holien Bø og fotograf Emil Jangård Rasmussen har fått i oppdrag å style og fotografere. Saman flyttar dei seg frå leilegheit til leilegheit, frå rom til rom. Med seg har dei møblar og store kassar med rekvisittar.
– Jobben min er å skape ein heimleg følelse i leilegheita, som gjer det lettare å sjå moglegheitene. Vi skaper eit inntrykk av kva du sjølv kan få til her, og kor fint det kan bli, forklarar Holien Bø.
Ho har gjort fleire stylingjobbar for Eigedomsmekling Sogn og Fjordane, og merkar auka interesse for tenestene ho tilbyr.
– I byane er det heilt vanleg med profesjonell bustadstyling ved eigedomssal. Eg trur vi vil sjå meir og meir av det i Sogn og Fjordane framover, seier Holien Bø, som synest det er heilt topp å farte rundt i fylket og style bustader.
Saman med Rasmussen tek dei for seg rom for rom i dei nye leilegheitene.
– Det går i hundre, ler Rasmussen, før han blir ropt inn i neste leilegheit, der alt er klart til neste bilde.
Fornøgd utbyggar
Også Olav Fuglestrand, utbyggar og medeigar av prosjektet, er på plass på Søreide denne dagen. Han ser stor verdi i gode bilde til marknadsføringa.
– I heilt tomme, nye leilegheiter har dette stor betyding. Mange kjøparar klarar ikkje å sjå for seg potensialet, og då er det viktig med ein bustadstylist som kan synleggjere det. At bilda fenger har mykje å seie for marknadsføringa, seier Fuglestrand, som er svært fornøgd med prosjektet.
– Her bur du landleg og fredeleg, samtidig som det er ganske sentralt. Du er nær både skogen, fjellet og fjorden, og har fotballbane og tennisbane rett bak bygget. Legg du godviljen til, kan vi putte på fjordgløtt på bustadannonsen også, smiler han og legg til:
– Det har blitt eit veldig bra prosjekt. Vi gler oss til salsstart.
Første byggesteg i Søreide bustadprosjekt tilbyr fem leilegheiter i varierte storleikar, frå 50 – 92 kvm. Dei minste har eitt soverom, og dei største har tre soverom og to bad. Alle leilegheitene har bra standard med einstavs parkett, golvvarme, stor terrasse og er inkludert integrerte kvitevarer. Alle er på bakkeplan. Leilegheitene kjem for sal før påske. Følg med!