Med stoltheit for yrket: Møt Trond Bakke
Så lenge han kan hugse har han lese bustadannonsar, og eit godt sal gjer han glad. Det låg i korta at Trond Bakke skulle bli meklar.
– Eg har alltid likt å følgje med på kjøp og sal av eigedom.
– Det er vanskeleg å sette ord på kva som fascinerer, men heilt sidan Finn.no kom i 2000 har det vore spennande å følgje marknaden. Eg er nysgjerrig og interessert i kva som ligg ute og kva det blir omsett for, seier Trond.
I 2000 var han berre 16 år, og når han etter kvart også oppdaga at han likte å selje, var kursen staka. Det skulle likevel gå nokre år før han var der han skulle.
– Etter militæret, jordomsegling og eit år på universitetet, fekk eg tilbod om ei meklarstilling i Bergen. Eg slutta tvert på universitetet, for det var ingenting eg ville meir, smiler Trond.
6 kjappe med Trond
Beinhard jobbing
Å vere ung og ny meklar i Bergen vil enkelte skildre som brutalt. Det er hard konkurranse, og ikkje uvanleg å kjempe med 3-4 andre meklarar om kvart oppdrag.
– Du må vere beinhard og jobbe mykje for å lukkast. Mange slit med å komme i gang, og helst skal du ha eit namn og eit rykte før du vinn oppdraga. Det var difor med skrekkblanda fryd eg fekk mitt første oppdrag. Huset vart seld 300.000 over takst etter tre veker i jobben, og eg hugsar at det var ei veldig god kjensle, og med ærefrykt for det store ansvaret.
Etter at det vart krav om utdanning for å vere eigedomsmeklar, søkte Trond seg inn på treårig bachelorstudie i Sogndal. Han tok like godt økonomiutdanning samtidig.
– I tillegg jobba eg ved Sogndal-kontoret til Eigedomsmekling Sogn og Fjordane.
– Travelt?
– Eigentleg ikkje, seier han og trekker på skuldrane.
– Eg likar å jobbe. Det er difor eg er meklar.
Tettare på kundane
No er han siste tilskotet i meklarstaben til Eigedomsmekling Sogn og Fjordane. Han har gått frå by til bygd og frå bygd til bygdeby. Kor likar han best å jobbe?
– Det er litt færre spisse olbogar i Sogn og Fjordane, men det kan vere krevjande å etablere seg som meklar her og. Heldigvis har det gått fint, og eg er godt i gang. Den største forskjellen er at her må du kunne selje alt – frå gardsbruk i utkantane, til eksklusive bustadprosjekt i byen. I Bergen er det mest leilegheiter og einebustader i sentrum. Litt meir køyring her, kan du seie, ler han.
– Er det forskjell på kundane her og i Bergen?
– Menneske er menneske, men det er mindre forhold her – på godt og vondt. Som meklar kjem du opp i mykje forskjellig, og på små stadar kjem ein tettare på kundane. Men eg treff nye menneske kvar einaste veke her i Førde også.
Ivrar for gode sal
By eller bygd, Trond brenn for jobben som eigedomsmeklar.
– Min styrke er at eg er flink til å sjå an interessentane og legge til rette for gode sal. For å oppnå rett pris må ein ha ein strategi på korleis visinga og bodrunden skal gjennomførast. Det er heilt avgjerande, seier han.
– Når kunden er fornøgd er eg fornøgd. Eit godt sal gjer meg glad.
Det er spesielt eitt råd han ønsker å gje deg som skal selje hus:
– Vel rett meklar! Ein som står på frå start til slutt, får rett pris for eigedomen og ivrar for at du skal bli fornøgd. Ein skal legge stoltheit i jobben ein gjer som meklar.